شبكة كورة بلدنا الرياضية | خليها على الله غازي غريب - دورينا شباط الخباط .. معليهوش رباط

خليها على الله غازي غريب - دورينا شباط الخباط .. معليهوش رباط

خليها على الله غازي غريب - دورينا شباط الخباط .. معليهوش رباط

18 أغسطس 2018

17.34:23 م

خليها على الله
غازي غريب
--------------
دورينا شباط الخباط .. معليهوش رباط
-----------------------------------------
فات الكتير ما بقاش إلا القليل .. فوق : الأمور بدت تهدا .. وتحت : يا روح ما بعدك روح ومحدش أحسن من حدا .. والكلام عن الدوري الفلسطيني الممتاز في جنوب الوطن .. والكورة الغزية إللي كانت نار نار نار صارت رماد رماد رماد .. وكل دوري أضعف وأنيل من إللي قبله .. والفرق كلها مستواها واحد .. مره فوق ومره تحت .. ومش بعيد عن الحالة الغزاوية العامة .. باردة حامية .. حامية باردة .. وكل الفرق زي شباط مفش على لعيبتها رباط .. يوم شميس ويوم مطار .. ويوم مكاكاة الشنار .. وفرق في الطالع زي الشجاعية .. وفرق ميزانها ضايع زي شباب رفح .. والدوري انفلت معياره .. وإللي تحت اتفرعنت على إللي فوق .. زي القادسية لما هدّت حيل الصداقة وضيّعت عليه الدوري .. والمصيبة .. لا والله أم المصايب .. قبل الموسم آلاف الدولارات بتتبعزق هان وهان .. بصفقات مالهاش أمان .. وإللي بتفتكره فرعون بيطلع هامان .. واللعيب الفلاني حيجيب الديب من ديله .. والعلاني حيشبّع كل جعان .. وغزة مقبله على أيام سودا ويارب أكون غلطان .. وايش بدها الأندية تعمل في سد الخانات في الموسم الجاي وكل أموال المنح والرعاية يمكن تكون في خبر كان .
على الورق وقبل الهنا بخمس أسابيع .. وحسابات الورق غير حسابات الملعب .. ومش دايماً حسابات القرايا بتيجي مع حسابات السرايا .. على الورق شباب خانيونس بطل الدوري الممتاز لموسم 2017 / 2018 بنسبة 9, 99 % .. والصداقة فرصته صارت صعبة كتير وقدامه ماتشين الشباب والخدمات في رفح وماتش الشاطئ المهدد بالهبوط .. وكمان يمكن يفقد المركز الثاني ويروح لخدمات رفح أو الشجاعية .. والرياضي طلع خالص من المنافسة وبعيد عن الجهازين الفني والإداري ( دود المش منه فيه ) .. وشباب جباليا وشباب رفح ومعاهم الهلال دفيانين ومش مهددين .. بيضل الأربعة الأهلي والشاطئ والقادسية واتحاد خانيونس في صراع البقاء .. وعدد من ماتشاتهم فيها تخبيط في بعض .. وبأتوقع الخط الأحمر إللي عنده طوق النجاة من الغرق يكون النقطة 24 أو 25 .. يعني الأهلي والشاطئ بدهم 9 من 15 .. والقادسية واتحاد خانيونس بدهم 10 من 15 .. وممكن نقاط النجاة تقل عن هيك نتيجة تخبيطهم في بعض .. وقبل ما نروح للفرق وكلمتين وبس .. من واجبنا كلنا نصقف صقفه قويه لاتحاد الكورة إللي قاعد بيعمل من الفسيخ شربات .. لجنة المسابقات أم تلات دوريات وكاس .. ونوارة دورياتنا الحكام ولجنتهم .. ألف تحية وصقفة قوية .. وأمن وأمان الملاعب كله في ولادنا ضباط وصف ضباط وأفراد شرطتنا الفلسطينية .
ويرجع مرجوعنا للفرق في كلمتين وبس :
------------------------------------------------
• شباب خانيونس : بيقرص وبيلبد .. أكثر الفرق ثباتاً في المستوى .. وبالنسبة لمديره الفني صانع الفرح حبيبي محمد أبو حبيب إلو عندي كلام كتير .. يوم الفرحة الكبيرة .. وأبو البطولة حسن حنيدق .. خلاص يا أبو علي .. البطولة والله يساهل عليك .
• الصداقة : يا فرحة ما تمت أخدها الغراب وطار .. أنا حاسس الفرقة فيها حاجة غلط .. القلوب مش عند بعضها .
• خدمات رفح : هانا اللغز إللي محيرني .. أحلى كورة .. لكن النتايج خاصة في الدور الأول مش قد هادي الحلاوة .. خيرها في غيرها .. وتأتي متأخراً خير من أن لا تأتي أبداً .
• غزة الرياضي : مستعجلين على إيش ؟؟ .. وأول مرة الرياضي ما يكونش إيد وحده .. والبلعاوي عمل إللي عليه .. والباقي عندكو .
• الشجاعية : إيه ده .. إيه ده .. إيه ده .. وخلص .
• شباب جباليا : ما أنت كنت فايع .. مالك .. إيش إللي جرالك ؟؟؟
• شباب رفح : الكلام عند اللعيبة .. مش عند حد تاني .
• الهلال : خد البقاء في الممتاز .. والله يعطيك العافية . وتقولش لحد .. الهلال اليوم هوه شبح الهلال بتاع زمان .. وكان الله في عونك يا حازم يا وزير .
• الأهلي : إنت إنت ما بتتغيرش .. موال كل موسم .
• الشاطئ : يا راجل عندك جماهير بتفلق الصخر .. وكوادر إدارية وفنية ماليه البر والبحر .. ومع ذلك تستمر السنوات العجاف .. وربنا يستر .
• القادسية : كورته حلوه .. قيراط حظ ولا فدان شطارة .
• اتحاد خانيونس : يا وجع القلب .. الحبيب والبعيد والقريب .
آخر الكلام
------------
كلام في الكورة :
تجري جري الوحوش .. غير رزقك لن تحوش